مودی سرکار نے رام مندر کے افتتاح کے موقع ہر ملک بھر میں ہم آہنگی اور یگانگت یقینی بنانے کے دعوے کیے تاہم دہلی اور ممبئی میں بعض شر پسندوں نے مسلم کش فسادات کی سازش پر بھی عمل کیا۔
دہلی کے علاقے کالندی کنج انتہا پسندوں نے موٹر سائیکلوں پر ریلی نکالی اور ایک مسجد کے سامنے کھڑے ہوکر نعرے لگائے۔
بھارت کے تجارتی دارالحکومت ممبئی میں بھی انتہا پسندوں نے مسلم کش فسادات کی سازش پر عمل کی کوشش کی۔ میرا روڈ کے علاقے نیا نگر میں انتہا پسندوں نے کاروں کی ریلی نکالی اور مسلم علاقے میں جے شری رام کے نعرے لگائے۔ رام مندر کے افتتاح کی خوشی میں انہوں نے پٹاخے بھی پھوڑے۔
حساس علاقے میں نعرے بازی پر جب مسلمانوں نے انتہا پسندوں کو روکا تو تصادم ہوگیا۔ پولیس نے 13 افراد کو گرفتار کرکے مقدمہ درج کرلیا ہے۔
معاملات کو قابو میں رکھنے کے لیے ممبئی کی انتظامیہ نے لوگوں سے کہا ہے کہ وہ میرا روڈ کے واقعے سے متعلق کوئی بھی وڈیو یا تصویر شیئر یا فارورڈ نہ کریں۔
میرا بھایندر وسائی ورار پولیس اسٹیشن نے مقامی ہندو اور مسلم باشندوں سے کہا ہے کہ وہ اس معاملے میں ضبط و تحمل سے کام لیں۔