عام انتخابات میں کراچی سے نمایاں کامیابی حاصل کرنے کے بعد ایم کیو ایم پاکستان نے کل یوم تشکر منانے کا اعلان کیا ہے تو دوسری جانب جماعت اسلامی نے انتخابی نتائج کو مسترد کرکے احتجاج شروع کردیا ہے۔
ترجمان ایم کیو ایم پاکستان کا کہنا ہے کہ متحدہ قومی موومنٹ کو کراچی کے عوام نے مینڈیٹ دیا ہے، جس کے باعث کل بروز اتوار یوم تشکر منانے کا فیصلہ کیا ہے۔
اس حوالے سے ایم کیو ایم کے ترجمان نے مزید کہ کہ ایم کیوایم پاکستان کا جناح گراؤنڈ عزیز آباد میں جلسہ ہوگا۔ عوام سے یوم تشکر کی تقریب میں شرکت کی اپیل ہے۔
دوسری طرف جماعت اسلامی نے کراچی میں انتخابی نتائج کو مسترد کرتے ہوئے الیکشن کمیشن سندھ کے دفتر کے باہر احتجاج شروع کردیا۔
صوبائی الیکشن کمیشن کے دفتر کے باہر مظاہرہ کرنے والے جماعت اسلامی کے کارکنان نے الیکشن کمیشن کے خلاف نعرے بازی کرتے ہوئے کہا کہ دھاندلی زدہ انتخابی نتائج کو تسلیم نہیں کرتے۔
مظاہرین سے خطاب میں امیر جماعت اسلامی کراچی حافظ نعیم الرحمان نے کارکنان کا لہور گرمایا اور 8 فروری کو ملکی تاریخ کا بدترین دن قرار دیتے ہوئے جدوجہد جاری رکھنے کا اعلان کیا۔